मी असाच जगतांना जळणारच!
सरणावर श्रेय मला मिळणारच!
तुमचा हा राग व्यर्थ! उबग व्यर्थ!
मी इथून आजउद्या टळणारच!
जन्माची वाट किती पाहू मी?
माथ्यावर चंद्र काय ढळणारच?
कां माझे मोहरते अंग अंग?
तुज माझे अंतरंग कळणारच!
आता मज दुःखाचे नाही भय...
माझे ह्या जखमांशी जुळणारच!
जोवर मज छळवादी प्राण छळे,
मीही मज श्वासांनी छळणारच!
प्रेमाच्या गावाचा हा प्रवास...
मी माझ्या वळणावर वळणारच!
No comments:
Post a Comment