पूर्तता माझ्या व्यथेची माझिया मृत्यूत व्हावी!
जीवनापासून माझ्या ह्या मला मुक्ती मिळावी!!
वेदनेला अंत नाही अन् कुणाला खंत नाही!
गांजणाऱ्या वासणांची बंधने सारी तुटावी!!
संपली माझी प्रतिक्षा गोठली माझी अपेक्षा!
कापलेले पंख माझे लोचने आता मिटावी!!
सोबती काही जिवाचे माञ यावे न्यावयाला!
तारकांच्या मांडवाखाली चिता माझी जळावी!!
दूर राणातील माझी पाहुनी साधी समाधी!
आसवे साऱ्या फुलांची रोज खाली ओघळावी!!
कोण मी आहे मला ठाऊक नाही नाव माझे!
शेवटी माझ्या धुळीने चौकशी माझी करावी!!
हे रिते अस्तित्व माझे शोध शून्यातील वेडा!
माझियामागेच माझी सर्व ही ओझी रहावी!!
काय सांगावे तुला मी काय मी बोलू तुझ्याशी!
राख मी झाल्यावरी गीते तुला माझी स्मरावी!!
No comments:
Post a Comment